Xogo de mesa

Un xogo de mesa é un xogo que se practica xeralmente sobre unha mesa ou un soporte similar e que é xogado por unha ou, máis habitualmente, varias persoas situadas á súa ao redor. Pode requirir dos xogadores o uso do razoamento táctico ou estratéxico, a coordinación, a destreza manual, a memoria, a capacidade dedutiva, a psicoloxía, a destreza negociadora, ou simplemente estar baseado no puro azar.^[1]

Pola súa natureza, os xogos de mesa non levan en xeral actividade física, aínda que existen algúns que implican levantarse da mesa e realizar actividades fóra desta; neste caso estes serían xogos de mesa pero non limitados á mesma.

Os sitios arqueolóxicos de Başur Höyük, preto da cidade turca de Siirt, achegaron pezas de xogo de preto de 5.000 anos de antigüidade.^[2]

1. ↑ "Factores en los juegos de mesa". Arquivado dende o orixinal o 11 de xaneiro de 2017. 
2. ↑ Lorenci, Miguel (21 de agosto de 2013). "El primer pasatiempo". Diario Las Provincias. Consultado o 22 de agosto de 2013.